ट्रेलरमा ‘कोशेढुङ्गा’: मर्मस्पर्शी प्रस्तुति, छाएकी छिन् सुरक्षा (भिडिया)

काठमाडौं– व्यवसायिक रुपमा कीर्तिमान कायम गर्न सफल भएको नेपाली फिल्म ‘पूर्णबहादुरको सारङ्गी’ का निर्देशक सरोज पौडेलको निर्देशनमा बनेको नयाँ फिल्म ‘कोशेढुङ्गा’ को ट्रेलर सार्वजनिक गरिएको छ । यही भदौ १२ गतेदेखि प्रदर्शनमा आउनभन्दा ठिक ९ दिनअघि यो फिल्मको तीन मिनेट ४४ सेकेण्ड लामो ट्रेलर मंगलवार काठमाडौंमा आयोजित एक समारोहबीच सार्वजनिक गरिएको छ । सेभेन सीज इन्टरनेशनलको प्रस्तुतिकरणमा निर्माण भएको यो फिल्मको ट्रेलरमा अभिनेत्री सुरक्षा पन्त छाएकी छिन् । उनी ट्रेलरको प्रारम्भदेखि अन्त्यसम्म नै देखिएकी छिन्, जहाँ उनको हँसिलो मुहार, चञ्चले स्वभावदेखि गम्भिर तथा पीडित महिलाको झलक देख्न सकिन्छ । ...